政Whats噏：肥尹細佬又黑又瘦　話係兄弟無人信

香港公務員工會聯合會第一副主席尹兆泰，與有「肥尹」之稱嘅立法會議員尹兆堅名字只差一個字，但因為佢哋身形同外貌完全唔似，只會以為佢哋巧合咁名字相似。不過世上就無咁多巧合，佢同肥尹的確係兩兄弟！

尹兆泰透露，以前與同事同行，咁啱街上掛住肥尹嘅橫額，同事就口痕問佢哋個名咁似係咪兩兄弟，而佢講出事實時，對方仲以為佢講笑，睇嚟好多人都覺得佢哋唔似樣。

尹兆泰比肥尹年輕一年半，4兄妹中排行第2，佢就話與哥哥身形大分別，因為佢會做運動，而性格上就哥哥比較健談。佢更話，自己膚色較黑亦都唔似哥哥，而當年媽媽解釋話只有陀佢時成日飲咖啡囉。

佢哋兩兄弟目前係工作上未曾合作過，亦都好少講工作，尹兆泰就話怕合作會令到議題焦點糢糊，變咗落喺兄弟上，但如果工會其他成員覺得合作有利，佢都唔介意同哥哥拍住上，但暫時就未曾試過。