港故：同白頭未能同到老 老婦喪偶尋死巧遇生命天使
20180923
東網電視
更多新聞短片
六年前丈夫離世後，現年75歲的李婆婆過着獨居生活，孤獨感強烈。(黃知樂攝)
「老公都行咗，我仲留喺度做咩？」同白頭，可惜未能同到老。想起往事，75歲的李婆婆在鏡頭前哭了。
也許每對夫婦終會遇到，老伴先走一步，留下另一半孤獨地面對餘生。六年前，在香港無親無故的李婆婆，丈夫因肝癌離世，她每天都以淚洗臉，屈在家中不願出街：「我每日喺廁所喊，喊到眼腫唔敢見人，真係好辛苦。」
「孤獨一個人，就好似無咗個世界咁...存在都無咩價值。」面對獨居生活，她無時無刻都惦記着丈夫的好：「我一諗到老公咁勤力、咁顧家，好多嘢我都難以忘記，所以就會喊，甚至想了結自己。」
曾想過自殺 陪着老公走
那天，輕生念頭變成行動，幸好當時李婆婆找不到窗框鎖匙，才打消了自殺想法。「到第二日落樓下，有一個姑娘(社工)見到我不停喊，就走過嚟關心我。」命運安排了這位素未謀面的社工在婆婆面前出現，「姑娘話，你講出來聽吓，佢不斷好耐心咁一句一句問我。」窗框鎖匙找不到，但此刻婆婆卻找到了打開「心窗」的鎖匙。
社工關心 走出喪偶陰霾
自此，這個機構的社工經常探望李婆婆，傾聽她的心事。「一次又一次都係姑娘耐心咁解釋，使我思轉變，人就係必須一死，在生嘅人一定要面對。」漸漸走出喪偶的陰霾，李婆婆找到活下去的意義。「經過咁多年，我會諗...我無讀書，咩都唔識，點解會有咁多人同我傾偈呢？佢哋就係想我活下去，所以我決心唔走嗰條路，一定要活下去，唔好辜負咁多人對我嘅一片好心。」
得到社工和義工們的關懷和陪伴，李婆婆不再感到孤單：「只要我有一日活着，我都會記住你哋對我嘅關心！」
長者自殺情況 每日一宗
生命熱線執行總監吳志崑指出，據官方統計每年大概有360多宗長者自殺身亡個案，即平均每天就有一宗，「長者好多時內心有鬱結，需要搵人傾訴，雖然可能係我哋未必能解決嘅問題，但一個聆聽嘅空間，可以畀佢嘅情緒得以宣洩。」他更鼓勵大家一起關心身邊的老人家。
生命熱線最近亦出版了一本書《生死角力─探索長者自殺的主觀世界》，希望社會大眾更了解長者自殺問題：他們的內心世界是怎樣？怎樣洞察一個長者有輕生念頭？又可以做甚麼去化解？
今集《港。故》用6分半鐘，走入李婆婆的內心世界，希望能令大家更了解老人家所面對的心理困境。
-------------
《港。故》：東網每周專題習作，講故事、講香港人的故事，請關注《港。故》FB：http://bit.ly/oncckonggu_FB
Follow埋《港。故》IG，睇更多精彩靚相：http://bit.ly/oncckonggu_IG