政Whats噏：韓志強等收工　沙中線唔提唔存在

發展局工務科常任秘書長韓志強將於下月退休，數數手指佢已經加入政府38年，大部分時間都主理同工程管理相關嘅工作，而佢亦以政府代表獲委任為港鐵董事局非執行董事，但喺佢回顧公務生涯時，竟然話最記憶猶新係處理彌敦道水浸同淨化海港計劃，隻字不提沙中線醜聞，唔通佢冇留意到外界幾擔心紅磡站嘅鋼筋問題？唔通佢以為唔提就唔存在？

臨別依依，發展局局長黃偉綸今日(23日)發表網誌，話趁韓退休前相約分享感受，回顧下工務生涯，其中提到九十年代，每逢大雨，旺角彌敦道近太子道一帶有嚴重水浸，更有「彌敦河」之稱。時任渠務署總工程師嘅韓志強呻話當時壓力好大，若以傳統方法斬件式進行工程，估計需時約5年，遠水不能救近火，所以大膽決定全線封閉彌敦道一段半公里長的北行線，最終工程喺9個月內完成。

韓又提到淨化海港計劃，話當年承建商喺進行第一期深層隧道挖掘工程時，發現隧道不停滲水，承建商更喺無足夠準備下採取決絕態度，停工長達半年，兼向政府提出不合理要求，雙方亦進行多輪談判同打官司，最終政府勝訴，更換承建商。而工程重啟後亦幾經波折，包括發生沉降、鑽挖機損壞、遇到地底斷層等，最終化險為夷咁話。

韓志強又話，對於近期個別大型項目出現連串事故，並不代表整個業界都出問題咁話。講嚟講去，都係冇提到近來爆出連串醜聞嘅沙中線，爆出紅磡站涉「剪筋」造假等事件，佢作為非執董，早前聲稱港鐵董事局被蒙在鼓裏，依家絲毫無損，即將「拍拍屁股」就走人，連回顧時都唔敢提，唔知係咪因為沙中線為佢嘅工務生涯蒙上污點呢？