政Whats噏：撤MPF對沖　林健鋒話中小企流血不止

施政報告將於下月出爐，屆時將會交代取消強積金對沖及改善產假等勞工議題，商界似乎好擔心，依家已經出口術。商界立法會議員林健鋒(Jeffrey)今日(23日)出席一個電台節目時話，社會討論取消對沖、延長產假等提高勞工權益嘅政策，唔少中小企正掙扎求存，依家已經「周身都傷晒，流血不止」，希望政府唔好樣樣嘢都向商界「開刀」喎！

政府早前公布取消強積金對沖嘅初步構思，建議劃線方式取消對沖，強制僱主按僱員月入1%作專項戶口供款，並向僱主提供12年兩重遞減式補貼，金額增至172億港元。Jeffrey認為，政府應該「落水更深」，將財政承擔最少增加一倍，補貼期亦應該延長至20年。

勞顧會勞方委員鄧家彪接受查詢時就指，咁樣嘅講法會令人覺得商界有少少貪得無厭，不過，勞顧會都同意政府要喺取消對沖上，增加對商界嘅支援，佢希望商界唔好過分憂慮，唔好一味靠嚇，等政府嘅整個方案推出咗先喎！