政Whats噏︰電動車非法充電　許智峯被投訴

潮流興環保，多咗人改揸電動車，但就要先解決充電問題。立法會議員許智峯（峯鴿）都係電動車車主，最近我哋就收到讀者投訴，話峯鴿喺堅尼地城石山街嘅停車場，涉非法取用場內牆身嘅插蘇裝置，為其電動車充電，仲要停車場管理員多次告誡都冇用。峯鴿接受我哋查詢時，就拒絕回應事件。

根據讀者提供嘅多張照片，峯鴿嘅電動車都係泊喺停車場柱位或牆身隔離，並正用柱位同牆身嘅插蘇嚟充電。而查冊資料顯示，峯鴿嘅電動車以約40萬元購入，日本出產，出廠年份係2011年，首次登記日期係同年6月，相信部車都用咗好一段時間喇，峯鴿應該都好清楚應該點樣幫部車充電先啱。

話時話，峯鴿都唔係第一次因為部車而惹是非。去年10月，佢揸車到中環出席一個活動開幕禮，佢就將架車駛到中環德輔道中機利文街路口，然後倒車泊入機利文街內。當時峯鴿就被指涉嫌違例泊車，但佢嗰陣就話只係一場誤會喎。依家佢又再因為架車充電而被投訴，真係鑊鑊新鮮鑊鑊甘！