政Whats噏：元朗天價橋擱置到明年　政府搞乜？

涉款逾17億元嘅元朗高架行人天橋備受關注，本來喺立法會復會後就安排重上財務委員會審批撥款，但政府日前跪低抽起項目，令各界怨聲四起。據聞政府原本打算採取先招標、後撥款方法，喺暑期偷時間圖「減磅」以便闖關，點知暑假期間接連爆出沙中線醜聞，周圍又有沉降，仲有颱風「山竹」襲港兼高鐵通車，令到運輸及房屋局局長陳帆忙到一頭煙，局內上下都無暇顧及天橋項目，惟有焗住抽起。有傳招標工作要搞半年，最快明年初先可以再提上議程，隨時拖累工程竣工日期延遲1年。

天橋項目喺今年5月首次闖立法會工務小組，因為要價太高，被唔少議員狠批為「天價橋」，反對聲音此起彼落，連帶喺元朗區議會都引起反彈話太貴，最終迫令5大專業學會聯手反對。當泛民及建築、測量、都市規劃及園境界立法會議員謝偉銓(Tony)都表明反對，加上部分獨立建制派有怨言，令項目撥款危危乎，逼到政府急急補鑊，搵一眾議員及學會溝通吓。

綜合各方消息，當局喺暑假期間，並無聯絡各派議員再傾偈，包括最關注項目嘅Tony、議會陣線朱凱廸同工聯會陸頌雄等，因為暑假期間招標工作唔順利，依家仲寫緊標書，所以要抽出議程等等先。

對於局方突然公布抽起項目，一眾議員都嚇一跳。身兼元朗區議員嘅陸頌雄話，上周五(5日)有事聯絡運房局，對方先透露會公布抽起，聲稱唔係打退堂鼓，一定會再提上會。佢批評當局過去3個月唔知做過乜，擔心愈拖愈耐，會有加價壓力，將來17億搞唔掂咁點算？敦促政府要開誠布公，交代工作進度喎。

說到底，事件都係「錢作怪」！大嗱嗱用10幾億元起一條540米長嘅天橋，不論支持定反對，無可避免要面對難以向公眾交代嘅情況。不過因為陳帆唔得閒搞而抽起，亦好難令人接受，唔通元朗居民擠迫咗10年，都未夠逼切性去促使政府出手解決？