政Whats噏:會議室擴建 鄭泳舜謝偉銓終可埋堆

20181011
東網電視
更多新聞短片
鄭泳舜、謝偉銓終於可以同自己友「埋堆」。(陳德賢攝)
每當立法會審議具有爭議性嘅議題,不時都會上演「動作片」,所以秘書處會安排後備會議室,一有事就轉場。位於大樓2樓嘅會議室2喺暑假期間完成擴建,由原來嘅66個座位增至84個,而根據最新座位表,進入議員半年多嘅「議會新丁」民建聯鄭泳舜同建築界謝偉銓,終於可以同自己友「埋堆」,免分離之苦。
立法會以往就只有會議廳同會議室1可容納全體議員,其中會議室1經常開財委會同工務小組會議,一旦發生衝突,議員就要轉去會議廳開會。據了解,上年度秘書處已將會議室2列為財委會後備會議室,皆因有議員反映唔想走上走落去會議廳,所以之前準備咗好多流動枱櫈備用,等會議室進行擴建。
根據最新會議室2座位表,鄭泳舜與黨友何俊賢為鄰,左後方就係幾有分量嘅黨友黃定光,右後方更係黨友兼建制派副班長陳克勤;謝偉銓則重歸「六人組(G6)」,同旅遊界姚思榮做鄰居。議會陣線區諾軒同范國威,就分別同朱凱廸同陳志全坐埋一齊。