政Whats噏:馬逢國姚思榮唱雙簧 倡設文化旅遊局

2018年10月13日 19:52
東網電視
更多新聞短片
馬逢國(左圖)和姚思榮(右圖)均倡設文化及旅遊局。(譚敏聰攝)

施政報告提到會研究分拆運輸及房屋局,但對設立文化局就隻字不提。不過,體育、演藝、文化及出版界議員馬逢國食咗個大檸檬仍然唔放棄,提出成立文化、體育及旅遊局;而旅遊界議員姚思榮就支持成立文化及旅遊局,認為體育應該留番畀民政事務局管理會好啲。

對於政府講明今屆任期內不會考慮設立文化局,馬逢國坦言政府講到咁「倔」好失望,批評現時文化政策散亂,例如博物館係民政事務局負責,文化商業活動就歸商務及經濟發展局,藝術教育就由教育局管理,佢認為文化應該由一個專門政策局去統籌。佢又話,單獨設立文化局會有好大阻力,所以早就建議設立文化、體育及旅遊局,認為三者關係密切,加埋一齊爭取力度會大啲。

姚思榮亦認同文化同旅遊關係密切,舉例政府投放好多資源去保育歷史文物,但又唔向市民或遊客宣傳,未能發揮經濟效益,如果一條龍處理就好好多喇,不過佢就指體育好似格格不入,都係留返喺民政事務局比較好,即係支持設立文化及旅遊局。姚同馬兩個同聲同氣,一唱一和,唔知能否說服到政府改變立場呢?