政Whats噏：逆耳忠言變音符　醫生夾BAND籲減糖鹽

忠言總係逆耳，醫生一直叫大家食少啲鹽同糖，大家幾時有聽從過？於是一班夾開Band嘅醫生就將逆耳忠言化為旋律音符，將Beyond經典作品《不再猶豫》改編為《不再油鹽》，開首第一句就唱出你我心聲：「從前食嘢愛油鹽，食到超標不太掂」，琅琅上口又洗腦，歌詞中仲教埋大家點樣唔落鹽糖但又唔會食到口寡寡添！

香港公共醫療醫生協會會長麥肇敬同5位聖約翰救傷隊嘅醫生一齊夾開Band，大家喺今年8月時開始構思，諗吓點樣透過歌聲鼓勵大家食得健康，忽發奇想覺得《不再猶豫》呢首歌嘅歌名同旋律好啱用嚟改編。如果大家想預防三高，兼且「驟眼腹肌多兩嚿」，首歌就叫大家「欲撇甩三高清清淡淡先至好，若覺得口寡加葱蒜落吓醋。」

呢個歌嘅MV拍到同專業樂隊有得揮，初版喺網上出咗2日已有2萬名網民觀看，喺社交平台呃到唔少「like」。MV今日(16日)正式登陸「全城減鹽減糖」Facebook專頁，樂隊帶來利用社交媒體推廣，叫大家日常要少鹽少糖少油，長遠可以減低患慢性病機會，紓緩到公立醫院服務。

咪以為二次創作好易，在歌曲中擔任結他手及有份填詞嘅麥醫生話，成隊band六個人為咗夾到全部人時間練歌簡直難過登天，佢哋前後只係練咗三次，錄MV嗰日由收工後7點錄到凌晨1點，之後仲要繼續返工。不過麥就笑笑口話：「醫生時常on shift(輪班工作)、overnight(通宵)」，OT一晚無難度啦。