政Whats噏：競爭力排名下跌　楊偉雄小學雞死撐

香港創新科技發展落後於鄰近地區，立法會議員同資訊科技界人士早已鬧爆政府慢幾拍。日前世界經濟論壇就公布2018年度《全球競爭力報告》，香港今年嘅排名下跌1位，僅排第7位，落後於新加坡同日本兩個同位於亞洲嘅經濟體，而喺細項創新能力方面更係只排第26位。雖然該份報告矛頭直指香港創新能力唔夠，但負責嘅創新及科技局局長楊偉雄就繼續死撐，仲話睇番報告入面，香港喺某啲部分係比其他亞洲地區排名高，覺得值得驕傲咁話。

楊偉雄今日(19日)出席電台節目時，就提到世界經濟論壇本周二(16日)公布嘅新一份《全球競爭力報告》。對於報告指香港創新能力等方面遜色，但佢就死撐話香港嘅創科其實仲有優勢，例如喺「創新公司增長」方面，香港排行第11位，而其他亞洲地區中，日本排第13位、新加坡同南韓就分別排行第20位及第37位。至於喺「擁抱顛覆意念公司」方面，香港排名第8位，新加坡、南韓同日本就分別排第16位、第35位同第38位，認為根據呢個排名，香港喺亞洲地區嚟講都唔算差，仲算係幾叻喎。

其實香港創科排名都唔係淨係今次落後於人，今年6月瑞士洛桑管理學院發表嘅2018年全球數碼競爭力排名報告中，香港都由排名第7位跌至第11位，該報告都指出香港喺教育、科研嘅公共開支偏低，創科公司數目少，係香港跌出十大嘅死因。楊都不得不承認香港喺研發方面比較落後，喺研發嘅投入僅佔生產總值0.7%，所以政府已計劃喺2022年，將公私營研發投入總額增加至佔生產總值1.5%、即約500億港元。仲要等到2022年，真係蚊都瞓喇。

楊仲話，如果要改變係唔可以只靠政府，好似美國、新加坡、同埋深圳等地嘅私營企業所投入嘅資金都比政府多，但香港依家就調番轉，所以會推出「超級扣稅」，希望可以刺激到更多人投資科研。講到尾，係咪又係旨意私人企業自己去做呢﹖創科局成立至今都成3年，但香港創科發展就未見起色，楊如今仲只識死撐，真係要檢討下喇！