政Whats噏：不獲平權活動邀請　陳章明被批花瓶

平等機會委員會主席陳章明任期將於明年4月屆滿，唔少人對佢任內表現感不滿，自上任以來佢都有份獲邀出席支持同志平權活動，但今年就唔見影，仲畀早已「出櫃」嘅立法會議員陳志全(慢必)暗示佢係花瓶，到底係咩原因？

慢必今日(21日)喺一個支持同志平權活動上，就忠告有意申請出任平機會主席嘅人士，話平機會主席唔單止係一份工，亦唔係一個「花瓶」，甚至唔係出席支持平權活動後影相交功課。佢仲話平機會主席如果只係當打份工，冇為性小眾人士改變政策、盡力爭取權益同埋立法，就唔會容許該「花瓶」出席活動。佢仲形容，今次陳章明不被獲邀係破例做法。

除咗慢必，支持同志平權嘅前立法會議員何秀蘭亦批評，陳章明喺早前高級入境事務主任梁鎮罡申請司法覆核，要求其同性婚姻配偶可享公務員家人福利及共同評稅既案件上，冇譴責政府，所以絕對冇需要畀陳出席活動，「對人講人話」咁話喎。佢仲話，平機會主席需要同民間社會同行、同埋有原則。