政Whats噏：譚文豪裝假狗　話帶寵物搭車冇問題

隨住愈來愈多人鍾意養寵物，不時會喺公共交通工具上見到有貓狗「偷渡」。立法會議員譚文豪(Jeremy)早排就喺港鐵玩實測，要睇吓帶寵物搭車係咪真係會影響其他乘客，但喺香港寵物搭車好似唔得㗎喎？睇真啲，原來佢「裝假狗」！放隻毛公仔入袋就當係，唔怪得無人有反感喇。

話說Jeremy舊年已經叫港鐵學台灣搞動物車廂，點知港鐵話研究到依家都未見影，所以佢今個暑假就去飛去台灣，帶老友狗狗「呆呆」搭捷運同巴士。台灣嘅動物友善政策比香港多，寵物可以去餐廳陪主人食飯，Jeremy都專登同「呆呆」坐車去食雪糕。不過搭巴士時，佢就口快快叫錯「包包」，搞到「呆呆」畀唔到反應。

返到嚟香港，佢就帶毛公仔「旺財」去試搭港鐵，開頭用一架類似BB車嘅車放「旺財」，點知受到旁人奇異嘅目光，最後換咗另一款較密實嘅寵物袋，整個過程中無市民表現厭惡，Jeremy結論就係大家都接受到。但亦可能係其他早已睇穿佢「裝假狗」，所以無反應啫！