政Whats噏：明日大嶼挑矛盾　白鴿黨閉門平亂

政府提倡「明日大嶼」計劃，打算斥資5000億港元填海1700公頃，建議不單止喺社會上引起軒然大波，更挑起民主黨(白鴿黨)內部矛盾！該黨今日(21日)召開閉門研討會，討論是否支持填海計劃，據了解，會上氣氛和諧，並無激烈辯論，為時約3個半鐘，結果達成共識支持該黨房屋政策發言人兼立法會議員尹兆堅嘅立場，唔會一刀切反對所有填海。不過，聽聞會上氣氛好，只係「反對派」無現身，相信黨內仍有少量暗湧，未必好似睇落咁順利。

話說新一份施政報告喺本月10日公布，當日尹兆堅已表明，如大嶼山發展可按照「北發展、南保育」，又符合所有程序，該黨唔會一刀切反對填海。事隔4天，本月14日，民主派大舉出動參與反明日大嶼遊行，芸芸旗海中，唯獨不見白鴿飛揚，更未見尹兆堅身影。之後有黨內人透露，黨元老疑似支持填海唔畀黨員簽任何聯署，更唔准參與遊行，引起多人不滿。事後黨主席胡志偉都迫於無奈要現身解畫，強調政府如將目前方案原封不動交上立法會，該黨必定會反對。

白鴿黨今日下晝3點喺立法會召開閉門研究會，約40人出席，包括立法會議員、區議員、社區主任同部分基本黨員。尹兆堅會後話，絕大多數黨員都支持佢嘅一貫立場，席間大家認真討論填海問題，多人屬於有條件支持或反對，重申只要合乎程序，唔會一刀切反對，要逐個個案評估。

據了解，研討會由「地從何來」開始討論，涉及公私營合作、棕地發展、高球場用地等，而反對填海一派則認為，係驚政府不可信，填完海當局亂分地，最後幫唔到市民。有知情人士就透露，本來問題唔會鬧大，只係有啲有心人，認為尹嘅說法唔夠清晰，唔係無條件反對，故意對外講啲唔講啲。消息更暗指有心人係將退黨嘅人，到底係邊個呢？佢就話大家心知肚明喇。

一場遊行就鬧出咁大場龍鳳，相信尹兆堅必定經一事，長一智，下次唔得閒去遊行，都要求黨友攞旗出去。但姑勿論有心人係邊個，多數人都係理念相近，先會加入同一政黨，單就填唔填海，白鴿黨都搞成咁，可見黨內有一股離心力，令黨高層管唔得掂班細嘅，睇嚟係時候要檢討吓嘞！