政Whats噏：港航高層跳船　鄧竟成辭副主席

警務處前處長鄧竟成冇做一哥之後轉戰商界，於2016年加入香港航空時已獲委任為董事及副主席，今日(18日)就傳出消息指佢已辭去全職職務，改為擔任港航顧問。而港航回覆傳媒時確認有關消息，指鄧已於上月20日辭任公司副主席一職。

鄧回覆傳媒時解釋，辭任係「想多啲時間畀自己」，又形容「忙過做警察」，皆因佢仲有好多其他公務工作在身，包括郊野公園及海岸公園委員會主席等。

不過，翻查資料發現，港航近3個月接二連三有董事辭任，包括於10月離任嘅崔英旭同11月離任嘅蒙建強，連同鄧竟成即已有3名董事離任。而港航已經喺本月5日向查冊中心遞交咗「更改公司秘書及董事通知書」，相信係處理鄧嘅辭任。