政Whats噏：擔心初一難搵醫生　容海恩提早開刀生B

新民黨容海恩(Eunice)係香港首名在任期間懷孕嘅立法會議員，佢早前講過，預產期喺大年初一，下年係豬年，原本就會生個豬BB，但阿B嘅命運要改變啦！Eunice早前出席黨友傅曉琳喺東涌辦事處開幕禮時，講起預產期係年初一，擔心好難搵醫生，決定明年一月下旬提早開刀生，早過「立春」，即係豬BB會變成狗BB嘞，相信都一樣咁可愛嘅！

Eunice當日着住短裙出席戶外活動，連新民黨主席葉劉淑儀都擔心佢會唔會凍，Eunice就話隻腳唔怕凍，大肚婆唔會病，抵抗力特別強。佢又提到，BB已經31周，開始識踢佢，依家仲未改名，到底係生B仔定B女呢，佢就唔肯講，繼續叫大家估，但係就講笑話，日日帶返立法會叫大家幫手湊喎！