政Whats噏 : 政界率先換證　周松崗話趁得閒換咗先

入境處新一代全民換領智能身份證計劃今日(27日)展開，特首、行政會議成員、政府主要官員同立法會議員都可以喺今日至明年3月30日首階段換證。行政會議成員周松崗今朝9時許就到入境處位於灣仔瑞安中心嘅換證中心換新身份證，或為全港首位換證嘅政界中人。

周松崗今朝9時55分就到咗換證中心，約20分鐘就搞掂離開。被問到點解咁快就嚟換證，係咪心急想用新證出遊，佢就話只係想趁得閒換咗先。佢又話，入到換證中心會有工作人員檢查身份證確認身份，之後就打指模，再去影相，工作人員會畀一份表格以確認個人資料，到下月11日就可領取新證喇。

周又話，工作人員影相時會一次過影兩張再畀人揀。問到有冇為影新身份證相而作準備，佢就話冇特別準備，舊證影相時都係咁，張相都OK，聲稱「費事過境唔認得仲弊」，認真搞笑。