政Whats噏：黃之鋒新年願望　盼不再進出監房

官司纏身嘅香港眾志秘書長黃之鋒仍然被法庭扣起護照，冇得離港。佢尋日(1日)喺社交網站發貼，話新一年嘅願望，就係唔使再次進出監房。不過，尋日佢帶住港獨標語再次衝入俗稱「公民廣場」嘅政府總部東翼前地，難道之前入獄都仲未反省夠？

佢亦有回顧2018年，話記起去年初再度入獄，官司至今仲未完，擔心今年春季可能會再返入去，大呻冇護照出境冇得抖，感到好攰喎！翻查資料，黃之鋒涉及嘅佔旺刑事藐視法庭案的上訴，將會喺今年4月處理，而同案嘅社民連副主席黃浩銘去年提上訴失敗，經已刑滿出獄。

另外，同屬香港眾志嘅周庭自去年初被DQ後，平淡過日子。佢尋日亦有發貼做回顧，提及去年參選、DQ、助選，到最後去咗立法會議員區諾軒辦事處做嘢，去年9月更為咗盡快完成大學畢業要求，喺學校修讀6個科目，慨嘆功課多到可怕。