政Whats噏:DQ兼坐監 羅冠聰讀6年大學終畢業

20190115
東網電視
更多新聞短片
羅冠聰喺嶺南大學文化研究系讀足6年。
中學生要考入大學當然要付出相當多嘅努力,但入到大學都唔代表一定可以順利畢業,好似香港眾志常委羅冠聰就喺嶺南大學文化研究系讀足6年,對於考舊制嘅佢嚟講,順利的話大學其實只係需要讀3年,依家足足多咗一倍時間,好彩今日(15日)佢終於收到校方正式通知,仲喺Facebook上宣布終於畢業。
佢遲咗咁多先畢業都可以理解嘅,事關期間佢喺2016年當選立法會議員,雖然最終被取消資格(DQ),但相信做議員都用咗唔少時間,而佢前年又因重奪俗稱「公民廣場」嘅政府總部東翼前地而被判監,所以依家雖然畢業,但點睇都稱唔上順利,甚至可謂一波三折添。
其實香港眾志唔少成員讀大學都要延遲畢業,好似同羅一齊被判監嘅香港眾志秘書長黃之鋒當時亦需休學,依家仲讀緊公開大學社會科學系。至於前香港眾志常委、喺浸會大學修讀政治及國際關係學系嘅周庭,去年都曾經因為參加立法會補選而休學,結果今年頭都話自己正加緊腳步,一個學期要修6科,務求盡快畢業咁話。