政Whats噏：野豬為患　王國興倡送去無人島

香港野豬數目愈嚟愈多，經常擾民，根據漁護署引述嘅數據顯示，過去10個月全港收到679宗野豬出沒報告，佢哋為求覓食會推倒垃圾桶，有時又會撞傷市民，甚至衝出馬路，的確幾令人頭痛。而繼有立法會議員早前提出「引入天敵」後，東區區議員王國興今日(15日)再度獻計，建議將野豬送去無人島，定期餵食，咁就唔使殺咗佢哋，又唔會影響到市民嘞！

東區區議會食物、環境及衞生委員會今日商議野豬滋擾問題，王國興批評政府目前採用嘅絕育方法係「捉完又放上山，會繼續為禍。」所以叫政府搵個無人島做野豬林，送啲野豬過去就搞掂。不過，漁護署高級濕地及動物護理主任張家盛就話荒島嘅泥土、植物都較少，萬一野豬唔夠食物，就會游水返去最接近嘅陸地，無法解決問題咁話。

另一區議員徐子見就建議養狗去減少野豬嘅滋擾，不過張家盛指出狗可能會令野豬受驚，咁就可能會衝出馬路，危險性更大。查實政府個個建議都話唔可行，唔知政府仲有咩妙計可以盡快減少野豬擾民嘅情況呢？