政Whats噏:岑智明放18年前後照 揭人類危機?

2019年01月20日 17:02
東網電視
更多新聞短片
岑智明分享法國冰川差不多廿年之間的變化。(岑智明 fb)

呢排好多人都係社交網絡分享#10YearChallenge嘅圖片,大家着眼點可能係驚嘆時光飛逝,或者保養得宜好似「凍齡」咁,但有冇發現人類正生活喺危機當中?

天文台台長岑智明日前喺Facebook放咗張佢十年前嘅舊照,大家都見到佢頭髮由黑變白,今日(20日)佢又放咗幾張相,仲話覺得擔心,同埋話「更有意義嘅 #10YearChallenge、#20YearChallenge 或者 #NYearChallenge」。

點解?事關佢97年同15年都去過法國冰川Mer de Glace,差不多廿年之間,發現溶冰嘅速度令人震驚。97年仲可以企喺冰川上影相,15年已經冇可能嘞!佢話正正因為氣候變化同全球暖化搞成咁。

兩幅相對比好大,唔少網友睇完都覺得憂心,有網友直指「地球生態已經病入膏肓,人類如何面對全球氣候變化和怎樣應對?這是我們每個地球人的功課」。全球暖化所帶嚟嘅問題好嚴重,十年或廿年已變化得好緊要,試諗吓,N年後會變成點?