政Whats噏:資深樁腳又退出 新民黨公力結盟失效?

20190129
東網電視
更多新聞短片
公民力量資深樁腳不斷退黨,與新民黨結盟作用成疑。(設計圖片)
公民力量(公力)同新民黨早喺2014年結盟,當時新民黨只係新興政黨,成立只有短短數年,結盟後令新民黨樁腳數目倍增。不過,繼舊年沙田區議員黃宇翰選擇退出新民黨後,踏入新一年再多一人退出新民黨但保留公力身份,係咪代表結盟已經再無作用呢?
新民黨喺2011年成立,同公力結盟前只有12名區議員,相反公力早喺90年代成立,結盟之際區議員數目比新民黨多,結盟令新民黨區議員數名增加逾倍至31人,而公力主席潘國山更成為新民黨副主席,多年來同新民黨主席葉劉淑儀合作。不過,公力喺2015年嘅區議會選舉中大敗,5名資深區議員落敗同版圖大縮。
黃宇翰舊年退出新民黨時為新民黨中委,並且履行緊第二個區議會任期,佢當時就話唔太適應政黨文化同運作。至於今個月就有沙田區議員林松茵退出新民黨,佢本身係中委,且自2008年已經擔任區議員,地區工作更資深。
有公力中人分析,黃宇翰同林松茵都有資歷,選擇只保留公力身份係感受過以往公力專注地區、政治色彩較淡嘅年代,但加入新民黨後就多咗政黨包袱,地區工作受立法會嘅投票取態會左右,而公力結盟後嘅區議會選舉大敗,當時已反映結盟令公力政治化而影響到選情。再者,加入新民黨後實際上支援並非太多,而且新民黨內部向上流動機會細,好似最近委任嘅新副主席韓世灝都係空降,之前連中委都唔係咁話囉!
林松茵就話當初以公力身份從政,並擔任公力政策發言人故無理由退出,而且留喺公力會有較大發揮空間。佢仲話加入新民黨黨務繁多有感難兼顧,所以先決定離開,至於地區工作靠人情去維繫,唔係有資源就可以做好咁話。
保留公力同新民黨雙牌頭嘅區議員走下一個又一個,現時只剩下10個,仲未計盛傳會喺今年區議會選舉中退下火線嘅西貢區議員區能發、溫悅昌,以至沙田區議會主席何厚祥,望落情況不太樂觀。不過,潘國山就話林松茵係希望減輕黨務多陪家人,暫時未有迹象有人醞釀退黨,情況未算嚴重,至於結盟始終係好決定,可以取長補短,尤其係政策研究,以及同政府溝通方面有幫助。