政Whats噏：敗選李卓人使179萬　未清宣傳品罰7000

曾捲入「黑金醜聞」兼重返議會失敗嘅工黨李卓人，去年參加立法會九龍西補選總開支約179萬港元，按其獲得約9.3萬票，平均每票約19.3港元。不過，佢無手尾無清理宣傳品，收到食環署7張告票，署方至少幫佢拆咗3塊宣傳板、2條橫額、30支直幡及21張海報，另有2張「牛肉乾」，合共罰款近7000港元。

此外，李卓人收咗約97萬港元捐贈，當中以工黨及職工盟捐最多，分別為50萬港元及20萬港元。而佢雖然落敗亦大搞慰勞宴，仲揀正喺選舉後一個月、聖誕節正日舉行，有100人出席，淨係叫到會都使咗5000港元添！

至於被「二度DQ」嘅劉小麗冇得選都要使70萬港元，但就喺多個渠道籌得約47萬港元幫補。無獨有偶，連佢都有搞慰勞宴，但就早喺12月頭搞，廣邀80人出席，花3600港元叫到會。