政Whats噏：首位女副關長何珮珊　鄧以海稱創造歷史

原海關助理關長何珮珊早前晉升為副關長，是海關首位最高級女性官員，日後更可能成為首位女關長。海關關長鄧以海今日(31日)喺記者會就話，對於首次有女性出任副關長，係海關成立110年嚟嘅驕傲，創造歷史。

至於何珮珊會否成為海關首位女一姐？鄧以海話政府晉升官員，一直以經驗、領導才能同潛質為先，亦會考慮優先從內部晉升，性別唔會係不利因素，又認為由海關人員晉升關長，對海關係一種鼓勵。

何珮珊就好謙虛，感謝部門嘅信任及同事嘅支持，現時唯一目標要做好海關工作，協助關長帶領及管理部門，共同面對未來挑戰。

何珮珊91年加入海關，2014年任海關鐵路及渡輪口岸科總指揮官，曾帶隊打擊羅湖口岸的非法奶粉出境活動，至15年升任版權及商標調查科高級監督，16年初擢升為助理關長(情報及調查)，後來再調任助理關長(邊境及港口)。現任入境處處長曾國衞是何珮珊的丈夫。曾國衞早前接受傳媒訪問時指，二人是在借調到保安局工作時相識，07年結婚。