政Whats噏：懶理沙中線又爆醜聞　陳帆放假避風頭

臨近農曆新年長假期，唔少人都會放假抖吓氣，之不過近日沙中線紅磡站又爆工程醜聞，再加埋4000蚊嘅關愛共享計劃甩轆連場，但牽涉其中嘅運輸及房屋局局長陳帆，同埋財經事務及庫務局局長劉怡翔就齊齊放假過新年，唔知係咪想避風頭呢？

根據今日(1日)政府憲報，陳帆同劉怡翔一齊喺明日(2日)起開始放假，直到年初七(11日)先返工，抖足9日。最近兩個局都連環爆鑊，但係兩位作為一局之首，竟然喺風頭火勢，仲有閒情逸致咁過新年，唔知放假期間兩人會唔會諗吓計仔補鑊呢。

喺陳帆同劉怡翔放假期間，身為運房局副局長蘇偉文同埋財庫局副局長陳浩濂就要兼任埋局長嘅工作。依排兩個局都接二連三咁爆鑊，睇嚟兩位副局長都冇得抖，要喺工作中度過喇。