政Whats噏：社福瓣瓣唔掂　議員千Q追瘦葉文娟

今年初爆出收緊長者綜援申領門檻風波，尤其係特首林鄭月娥喺立法會講出「各位(議員)批准論」惹來跨黨派「震怒」，明言今年預算案實行「驗屍咁驗」。唔知係咪怒火未熄，預算案又提出斥資買物業，加埋其他政策瓣瓣都唔掂，今年嘅預算案書面提問中，社會福利署繼續成為最備受關注嘅部門，據悉問題高達逾千條，創下近三年新高，睇怕社署署長葉文娟都有排解釋嘞！

據悉，秘書處今年一共接獲7236條書面提問，較舊年6403條，增加833條。現屆立法會目前只有69名議員，扣除大會主席唔係財委會委員，共有68名議員提出書面問題，即每人平均提出約106條問題。

今年首五名「問題議員」同舊年一樣，工黨嘅張超雄提出1060條問題連任「問題王」，而第二至第五位則輕微調動，依次為公民黨(公文袋)郭家麒、社福界邵家臻、公文袋陳淑莊同譚文豪。

至於備受關注首五個政府部門，社署連續三年奪冠，由17年的988條，喺18微跌至698條，今年急增至1023條，創近年新高，難免令人將數目同收緊長者綜援門檻嘅風波掛鈎，今鋪班議員真係「驗屍咁驗」，免得再落人口實。其次繼續係教育局，有604條、第三位係食物及衞生局(衞生科)，有419條、第四位係食物環境衞生署，有248條，最後一位係環境保護署，有242條。

立法會財務委員會主席陳健波接受查詢時直指提問太多，透露今年曾經想過限制每名議員提問數量，以求令部門可更聚焦回應提問，但唔想太過設限所以冇做，或者明年預算案前再諮詢議員意見。

問咁多條問題要使幾錢？根據財經事務及庫務局喺2015年提過，每條問題成本高達4800元，唔計通脹去計算，今年嘅提問成本至少約為3473萬元公帑，認真嘥錢！不過，政府為免審到沒完沒了，每年都係承諾優先處理首3300條問題。