政Whats噏：逃犯條例修訂　劉鳴煒指父劉鑾雄受影響

港府擬修訂《逃犯條例》，一旦獲通過後，數年前喺澳門被裁定行賄及洗黑錢罪成嘅華人置業前主席劉鑾雄，就有機會被申請引渡到當地。社會討論得如火如荼之際，劉鑾雄大仔劉鳴煒一啲都唔避忌，今日(18日)喺一個網台節目被問到點睇修例時，坦言阿爸牽涉在內，或會受到影響而拒絕評論，向節目主持、立法會前議員劉慧卿(卿姐)話「你又唔係唔識我老竇(劉鑾雄)」。

劉鳴煒今午接受卿姐訪問，期間講到依家熱議嘅《逃犯條例》修訂，問佢作為商界有冇聽到業界有憂慮？佢就好審慎話係報紙睇過，但呢個課題唔方便講，仲反話卿姐唔係唔識佢阿爸。卿姐就寸爆話，做人坦白啲講出嚟，「你老竇好擔心啊？」劉就話，阿爸牽涉在內，佢講嘅嘢都唔係特別中立，唔評論喎。

卿姐連番攻勢狙擊下，劉鳴煒先鬆口話，不論商界、政黨定商會，就修例都唔係同聲同氣，認為值得去思考點解咁多人都有意見。咁有冇寫信去政府表意見？佢就話如果寫嘅話會「幫倒忙」，叫政府諗吓點解有人有憂慮，新方案可唔可以解決問題，解決到就值得推行。