政Whats噏：唔選大埔鄉委會　張學明疑裸退

27個鄉事委員會近日陸續進行正副主席選舉，目前已選咗大約一半，今日(21日)大埔鄉事委員會改選，但現任鄉委會主席張學明並冇參選，所以佢冇咗鄉委會主席個位，亦都唔會再係大埔區議會當然議員，即係連區議會主席個位都冇埋，有消息仲話佢可能唔再競逐連任新界鄉議局副主席添！唔通佢真係疊埋心水退休，實行「裸退」？

大埔鄉委會由南華莆村代表林奕權出任新一屆主席，下黃宜坳村代表陳笑權、新圍仔村代表張國棟就分別出任首副主席同副主席，三人都係自動當選，換言之，張學明將退下火線。

其實早前已傳出張學明會退落嚟嘅消息，指佢已經做過多項重要嘅公職，包括立法會議員同行政會議成員，加上大埔區議會、鄉委會、鄉議局等，名譽地位絕對唔低，所以佢已經冇乜要求，可以退位讓賢。張學明接受查詢時就話係因為年事已高，加上鄉委會有接班人，所以咪退囉！

鄉委會有接班人，但對於區議會主席，張學明就話冇理會咁多，會交番畀區議會自己再選過新主席。至於鄉議局副主席一職，雖然佢已經唔再係鄉委會主席，但鑑於佢仲係新界太平紳士，所以佢仲係鄉議局當然委員，有權去選，但佢就話鄉議局6月先換屆，距今仲有兩個幾月，會再考慮先咁話。

做得耐都唔一定退嘅，好似鄉委會中較為人熟悉嘅沙田鄉委會主席莫錦貴、上水鄉委會主席侯志強今屆依然喺冇競爭下自動當選，但梁福元就冇再競逐連任十八鄉鄉委會主席，改由水蕉新村村代表程振明接任做主席，所以張學明仲會唔會做鄉議局，可能都要等換屆先知喇。

查實今日仲有打鼓嶺鄉委會改選，結果由坪洋村原居民代表陳金華個女、居民代表陳月明，喺冇對手下自動當選主席，成為鄉委會首名女鄉頭，亦將成為北區區議會當然委員。

但係翻查資料，陳金華舊年9月曾經登報同佢個仔陳崇輝脫離父子關係，為嘅就係爭做村長，繼而角逐鄉委會主席個位，但最後佢竟然轉軚支持個女，陳金華就解釋係因為年紀大，加上早前健康情況欠佳，所以就唔做嘞。