政Whats噏：葉劉疑染流感　交容海恩代質政府

近來流感活躍程度持續下降，但就開始爆發麻疹，真係「一疫未平，一疫又起」。現年68歲嘅新民黨立法會議員葉劉淑儀(葉太)，尋日(26日)因發燒缺席行政會議，病徵似係感染流感，醫生已處方抗生素同特敏福兼要佢抖番幾日。葉太本來喺今日(27日)立法會大會上，質詢政府有關聘請副局長及政助標準，要交由黨友容海恩「幫口」提問。

葉太今早喺社交網站發貼，話自己上星期去格魯吉亞同匈牙利，參加為期6天嘅商務考察團，當地氣候寒冷，加上早晚溫差大唔小心冷親，考察期間已經不斷流鼻水同出現感冒症狀。雖然葉太平時議政都有氣有力，但有番咁上下年紀，染病真係可大可小，安全起見都要臥床抖抖，希望佢早日康復喇！