政Whats噏:馮煒光鬧爆港台日日唱衰國家

20190327
東網電視
更多新聞短片
馮煒光批評港台極少報道國家正面故事。(互聯網)
香港電台多次被鬧爆以公帑製作節目批評政府,立法會前議員鍾樹根曾經狠斥過港台「食碗底、反碗面」。前政府新聞統籌專員馮煒光日前就以時事評論員身份上港台時事評論節目,仲喺節目中多次批評港台,佢話︰「議員同傳媒,包括今日製作呢個節目嘅電台,幾乎每日都要唱衰自己國家先安樂。」唔知港台會否自覺今次捉蟲呢﹖
馮煒光喺節目一開波就話自從回鄉證變咗回鄉卡後,佢就成日袋住方便隨時返回內地,但香港有傳媒,包括製作呢個節目嘅傳媒,就極少報道國家正面故事,喺傳媒影響下仲搞到佢身邊一啲朋友唔肯過深圳河,唔肯去了解國家發展喎。真係一開聲就先打港台五十大板。
咁都未夠,馮又話國家40年來為7億人脫貧,但自詡自由民主勝過內地嘅香港,就為100萬人脫貧都未做到。佢又以深圳為例,話當地GDP都超越有民主自由嘅香港,香港真係望塵莫及,但香港嘅議員同傳媒包括港台,就幾乎每日唱衰國家,反問咁樣點令香港同國家有客觀理性嘅交流咁話。佢又提到一啲唱衰內地嘅議員一早已喺內地買樓,問到「醒目嘅香港人仲信佢哋?」馮喺人哋節目踩番人轉頭,真係唔知仲有冇下次喇!