政Whats噏:羅冠聰女友袁嘉蔚話改名 唔通想洗底?

20190401
東網電視
更多新聞短片
袁嘉蔚擺張相喺社交網站,話要改名叫「田灣袁」!(互聯網)
因宣誓風波被「DQ」立法會議員資格嘅香港眾志常委羅冠聰,其女友袁嘉蔚亦已退出眾志,今日(1日)仲突然話要改名,仲要改做「田灣袁」添!唔通佢想徹底洗底?今日係愚人節,玩嘢呀!
羅冠聰依家係現任立法會議員區諾軒嘅辦事處做兼職,而袁嘉蔚就係幫區諾軒做地區工作。袁嘉蔚今日喺社交網站Facebook上載咗張相,就係填表格申請改名,改做「田灣袁」。點解?佢貼文話諗咗好耐決定改名,事關喺田灣做地區工作都兩年,除咗「嘉蔚」之外,平時畀街坊叫得最多就係「田灣袁小姐」,叫叫吓有時會變埋田姑娘,所以佢今日決定去改名做「田灣袁」喎。
呢個post出咗之後,好多網友都話「今日係愚人節,開玩笑只能開到中午12點之前㗎喳...」,另有網友亦話「愚人節」玩到咁大,仲有網友話羅生(羅冠聰)「情何以堪!」亦有網友留言話「田灣完,唔係愚人節」,有部分網友仲同佢玩埋一份,建議佢不如改做「田灣猿」喇!佢真係改名抑或開玩笑?睇下有冇後續發展喇!