政Whats噏：搵外援宣傳　立會普通話導賞團飆升

唔好以為公營機構嘅宣傳一定係自己做埋，原來立法會都有搵外援幫手宣傳。根據立法會秘書處最新就財政預算案回覆財委會嘅資料，原來秘書處曾聯絡旅遊發展局幫手喺「Discover Hong Kong」網站介紹立法會導賞團服務，立法會普通話導賞團嘅比例明顯多咗，遲啲會唔會好似大學校園咁，逼滿「打卡」嘅內地遊客呢？

秘書處嘅資料顯示，為咗向訪港旅客推廣立法會工作，曾經聯絡過旅發局，立法會普通話導賞團喺2016至2017年度仲係281個，佔整體嘅14%，今個立法年度截至2月，即係共5個月，就有188個，即佔20%，比率明顯上升；至於粵語導賞團就由2016至2017年度嘅77%，下跌至本年度首5個月只有70%，睇嚟普通話訪客明顯增加。

其實香港有唔少景點都被內地遊客逼爆，唔知立法會會唔會成為下一個災區呢？不過，訪客入立法會要登記，估計都唔會畀太多人入去啩！