政Whats噏：預算案捧波宣傳片　製作費24萬

新一份財政預算案「減甜」，加上盈餘減少，仲要有赤字預算，搞到市民都唔多順氣，原來財政司司長陳茂波(波叔)攞住個波，話畀人聽邊度有得派預算案嗰條宣傳短片及宣傳聲帶，製作費花咗24萬港元。呢份「減甜」預算案，市民都未必想攞，派發地點隨時唔知好過知啦！

政府新聞處(新聞處)回覆立法會財務委員會特別會議嘅問題時，透露2019至2020年度財政預算案派發地點嘅宣傳片，以一條電視宣傳短片及一條電台宣傳聲帶計，製作費用係24萬港元，播放日期係2月18日至26日，即共9日。對上一個年度預算案派發地點嘅宣傳短片及宣傳聲帶，製作費用就用咗約34萬港元，今年用少咗錢，唔知係咪知盈餘少，要慳啲使啦！

新聞處又指，由2016年至今年，截至今年3月初，新聞處一共製作咗23套電視宣傳短片及電台宣傳聲帶，總開支逾888萬港元，多數都係宣傳施政報告同財政預算案。