政Whats噏：鍾庭耀退休即撲水　公布民研獨立甩轆

港大民意研究計劃一直定時定刻為政府施政、官員評分等發放調查結果，話畀港人知邊位問責官員長期「墊司底」，但隨住總監鍾庭耀退休離開港大，港大民研亦快將壽終正寢走入歷史，但鍾退而不休，決定搞眾籌另起爐灶，點知轉頭又甩轆，搞到要公開致歉。

鍾庭耀今日(23日)召開有關港大民研未來發展嘅記者會，公布會將港大民研獨立於港大並易名就「香港民意研究所」，今年7月1日將舉辦第一個公眾活動。佢又透露，本身已延長咗退休年齡，呢段期間亦同港大社會科學院院長討論港大民研嘅未來，傾過唔同方案後，決定以完全獨立於港大嘅新機構模式走落去，而佢屆時亦會離開呢個由讀書到工作結緣40幾年嘅地方，強調係「無怨、無恨、無悔」。

決定另起爐灶，以私人機構提供民研服務，經費一定係首要問題。鍾庭耀講明轉型後要社會資源支持先維持到唔收費項目，例如政府民望、官員評分等，日後呢類活動就要問市民想唔想繼續，希望嘅話就要有所付出，所以需要進行眾籌，而現時就以600萬港元為目標，用作啟動同成立研究所，之後就自負盈虧。其實研究所已喺今年2月註冊，下月4日正式營運，雖然面對資金問題，但佢強調要貫徹誠信同品質嘅理念，肯定唔會為五斗米而折腰咁話。

然而，港大民研呢頭預告解散，鍾庭耀又宣布要為將來撲水，轉頭就致歉咁失威，事關原訂今日公布「五大行政會議成員評分」結果，但因為同記者會撞時間而要讓路，押後到另行通告。

港大民研由90年代初成立，期間惹起唔少爭議，例如喺2000年7月爆出時任特首辦高級特別助理路祥安向港大施壓，要求停止進行對政府同特首民望嘅民調，之後亦曾被親中人士抨擊民研偏幫泛民，又曾引發身份認同爭議等，而佢帶領港大民研脫離港大之後，係咪會繼續咁惹火？大家要拭目以待嘞！