政Whats噏:港公廁臭出國際 謝偉銓叫政府借鏡內地

20190423
東網電視
更多新聞短片
謝偉銓早前參觀北京嘅老城區,話經過當區嘅公廁聞唔到臭味。(互聯網)
香港嘅公廁衞生惡劣,臭出國際,政府先至後知後覺,喺早前公布嘅財政預算案建議撥款翻新公廁,食環署署長劉利群仲列出四大目標,當時立法會建築界議員謝偉銓(Tony)已提醒佢要聽多啲業界人士嘅意見,而Tony上周去北京參觀老城區活化同保育,仲叫政府部門要借鏡當區公廁翻新嘅規劃。
預算案提出喺未來五年撥款逾6億港元翻新約240個公廁,喺早前嘅立法會財委會特別會議上,劉利群話將會以工作坊模式收集持份者對翻新設計嘅意見,期望達到四個目標,包括乾爽、無臭、無污漬,同盡快維修損毀嘅設施。
呢四個目標係咪假大空?冇人知,但Tony喺Facebook上載咗喺參觀北京嘅老城區活化同保育嘅相,仲貼文特別提到老城區嘅公廁經過改造翻新,唔單止同其他建築物協調得宜,經過亦聞唔到任何臭味,而今年預算案撥出公帑為香港嘅公廁翻新,呢啲細心嘅規劃同設計正好值得借鏡。有網友亦留言話公廁建得好,唔係問題,亦冇乜大不了,重要嘅係潔淨同衞生,但呢方面香港嘅公廁大多唔合格。
嗱!話說在前頭,唔好搞到一鑊粥之後,又賴話冇人提醒過,劉利群收到未?