政Whats噏：坐監照做公務　議員邵家臻怕被DQ？

2014年違法佔領行動(佔中)上月24日判刑，其中一名被告、立法會議員邵家臻被判囚8個月，不過佢竟然仲可以繼續跟進立法會事務？好似於上月30日開會嘅人事編制小組委員會會議其中一項議程係關於海事處開設常額職位事宜，而邵竟然喺上月29日，即開會前一日去信查問有關職位細節，情況同判刑前並無大分別。

其實唔單止立法會工作，邵嘅Facebook其實喺佢被判刑後都依然持續更新。邵雖被判監，但佢尚未被立法會褫奪議員資格，所以佢都仲係立法會議員，辦事處可繼續運作，去信提問並無問題。

問題在於點解判咗監都仲咁勤力，查實邵被判刑後至今未被正式送往監獄服刑，佢因為身體不適目前仍在羈留病房，不過就算邵已入獄，佢都一直有意喺坐監期間申請還押返立法會開會，履行議員職責，只不過懲教署目前正檢視申請理由同保安因素，咁睇嚟邵咁積極睇怕都係想可以成功申請返立法會開會，等佢唔使因為連續三個月唔出席會議而面臨被取消資格嘅風險喇！