政Whats噏：「分手」兩年　葉劉突踩場斥二少胡說八道

依家好多人喺網上表達意見，難免引起罵戰，轉過頭又多一單網上嗌交事例，今次主角更提升去立法會議員層次，事主更係曾經一齊創立新民黨嘅立法會議員田北辰(田二少)同埋葉劉淑儀囉。

尋日先有民主黨(白鴿黨)副主席、鴨脷洲利東邨區議員羅健熙，同白鴿黨區議員出身嘅前新聞統籌專員馮煒光，好小學雞咁喺社交網站來回幾十回合嘅「筆戰」，而最新就有8年前一齊創立新民黨嘅田二少同埋葉劉。其實佢哋早成陌路人，事關田二少兩年前就因理念不同而退黨，捱唔過七年之癮，而當時更有6名區議員跟隨田二少，被視為重創新民黨。

兩人之間火藥味未有隨田二少退黨而變淡，好似上年港鐵沙中線不斷爆出醜聞時，田二少提出用《立法會(權力及特權)條例》，而葉劉當時不顧舊情，批評田二少事前未有諮詢係擺委員會上枱，程序都亂晒大龍，及後田二少放棄角逐連任財務委員會副主席時，又反推薦葉劉，仲話「最硬淨嗰個，葉劉淑儀吖嘛」，可見二人有幾不和。

而近期鬧得最火熱議題就係立法會修訂《逃犯條例》，泛民同建制都曾各自發出聯署，田二少未有簽署建制派嘅聯署信，日前更喺Facebook上提出其他意見，仲公開埋畀政府嘅信件。而葉劉就喺尋晚去相關貼文留言踩場，指出已有資深大律師講得好清楚有關建議有問題，斥田二少唔好再胡說八道、誤導群眾，仲話田二少係個讀「遇」書嘅人，唔知係咪嬲得滯而將「過」字打錯個「遇」字喇。

田二少事隔大半日後作出回應，列出內地同聯合國嘅例子去證明可行，仲講到話「有讀過書又識字可參考」，臨尾更以「講完」作結，睇得出田二少對葉劉心中有氣喇！二人對話之後就完結無下文，但田二少肯用例子反駁，無意氣用事，令到今次比低質素罵戰好睇喇。

而網民都有圍觀食花生，葉劉同田二少各有支持者，好似有人話田二少只為引人注意另一邊廂就有人話葉劉反轉豬肚，誤導群眾同胡說八道嘅或者另有其人，仲反問葉劉等人係咪讀屎片喎。