議員預算案提修訂　劉怡翔：一個都唔好提

立法會周三(8日)將會辯論財政預算案，16名議員共提出合共156項修正案。財經事務及庫務局局長劉怡翔上周二(4月30日)去信，表明唔應該容許議員提出任何一項修正案，指修正案瑣屑無聊或無意義。多名提出修訂嘅議員都反對呢個講法，更指官員需為過失負責，削減薪金係理所當然。

劉怡翔喺信中提到，相信議員提出修訂要求削減政策局或部門開支，並無認真看待後果，若通過將令主要公共服務陷入混亂嚴重影響政府運作，削減政治委任官員或公務員等薪酬，會嚴重妨礙政府履行身為僱主嘅合約同法定責任，批評有關修訂只會佔用議會時間，唔會達致任何目的，亦唔會提供合理而真正嘅選擇方案以供審議，又批評部分修訂技術上有誤、不同議員同時動議重複嘅修訂等。

多名議員去信對劉嘅講法表達強烈不滿，其中郭家麒提到問責官員需為過失負責，削減部門首長薪金係理所當然，能令政府體現問責精神，削減部門運作開支更係反映該部門有空間改善。

最終，立法會主席梁君彥決定批出56項修正案，其餘100項不獲批，將預留約38小時討論及表決，與去年大致相若。翻查資料，今次係自梁出任主席以來，就撥款法案批出最少修正案嘅一次，佢喺舊年批出65項，前年批出185項。梁指今年獲准提出嘅修正案比率達36%，係近年最高。