港故mini:董之英執教鞭24年 熱血阿Sir教拍戲更教做人

20190510
東網電視
更多新聞短片
華Dee Sir直言每個學生都有調皮反斗的時候,這是心智未成熟的表現,並不代表他們很壞、心腸不好。(王鏡文攝)
「我覺得我係學生嘅Facilitator(協作者),書唔洗我教,我要嘅係陪住學生成長。」教書廿四年,人稱「華Dee Sir」的中學老師李頌華分享了他的教學心得。
機緣巧合執教鞭
華Dee Sir執教鞭前任職金融業,但他希望工作環境能與更多「人」接觸,機緣巧合下加入了仁濟醫院董之英紀念中學,任教至今。他亦經歷過公式化的教學生涯,每天如常地走進教室、如常地上課。但日子久了,他想自己做得更多,親手策劃的電影課程就成為他的「代表作」。
光影世界為學生帶來成功感
電影課程在中學不算常見,即使與正規課有所不同,華Dee Sir認為自己的使命都是一樣,「不管係傳統教學定係新派教學,老師嘅責任係傳道、授業、解惑,用依家嘅術語其實就係傳授知識、技能、態度,都係一樣。」
他認為電影課程能夠為學生建立自信,對他們應考DSE也有幫助,「好多學科有唔同限制,好多都有官方指定正確答案,你唔跟就係錯,但係電影世界好開放,無絕對嘅對與錯,一條好爛嘅橋都可以拍得好好睇,呢個係幫助年青人製造成功感,而唔係傳統學制所製造嘅不斷挫敗。」
伴成長比授知識重要
任教接近四分一世紀,華Dee Sir可算是見證社會變遷。他不諱言今天學生所學的比以往更艱深,「我覺得佢哋比上一代聰明好多,但點解會覺得佢哋差啲,因為我哋用上一代嘅標準去睇下一代。」在這番見解下,他不認為自己是「教師」,反而是學生的協作者,「我無可能比一部電腦聰明。」因此他更着重陪伴學生一起成長,這亦令他贏得「華Dee Sir」這個來自學生的親切稱呼。
不輕言放棄頑劣學生
早前學校被懷疑欺凌事件所困擾,對一直努力尋求改變的師生來說,也難免做成了打撃。面對風波,華Dee Sir明言不會放棄,「我諗每一個人都有調皮反斗嘅時候,好慶幸我未教過真係好壞心腸嘅同學,喺我眼中,有啲同學人係中學生,但心智係小學生,作為老師唔係要逃避件事,見到佢哋心智未成熟,正正就係幫助佢哋嘅時候。」
「喺我眼中新一代係無特別缺失,最大弱點係做人處世。」華Dee Sir認為電影課程能令學生在做人處世方面有得着,「由製作劇本到演繹,到去set機、去剪接,全部都係一個團隊一齊去做,我覺得同學嘅成長係好大,而呢個成長唔係用一個分數就可以衡量到。」
盼與舊生同追夢
與學生關係親如老友,華Dee Sir連夢想也與學生有關,「有朝一日離開學校,我會同我啲舊生合組一間公司,係做電影製作嘅,我哋做一間我哋嘅品牌出嚟,將我哋董之英學到嘅嘢、我哋所得到嘅情懷,可以透過電影製作去畀各位觀眾欣賞。」
今集《港故mini》用大約3分鐘,帶大家走進華Dee Sir的教學世界。
-------------
《港。故mini》:東網為你送上,香港各階層的小故事。