政Whats噏:漁護署劏魚指引惹議 何俊賢促擱置

20190512
東網電視
更多新聞短片
何俊賢要求漁護署擱置劏魚指引,稱用電擊暈活魚隨時會令魚販觸電。(設計圖片)
漁農自然護理署擬就街市活魚屠宰制訂指引,完成後就會畀食物環境衞生署轄下嘅街市魚檔參考,教魚販點樣替活魚進行「安樂死」。不過,漁農界立法會議員何俊賢(高佬賢)就話嚇親,耍手兼擰頭話唔明點解一嚟就發指引,唔先諮詢業界,已經去信署方要求擱置,仲掉轉頭教番政府點劏魚添。睇嚟漁護署署長梁肇輝都走唔甩,要學吓業界點劏魚嘞!
大家劏魚食魚咁多年,署方突然話想搞個指引,人道咁屠宰活魚,各界自然議論紛紛,有報道聲稱署方可能參考外國,用電擊暈活魚後屠宰添,同依家嘅做法咁唔同,自然引起外界憂慮。唔少網民喺高佬賢嘅社交網站專頁留言,批評政府出指引係矯枉過正,做法令成本增加,小市民就要捱貴魚,有人就驚啲魚未電暈,魚販就先觸電,仲有人話,不如要有麻醉師在場幫啲魚打麻醉針先,之後才可以劏魚,覺得諗出寫指引嘅人都應該係天才。
大家咁多擔心,高佬賢都聽到嘅,佢上周初去信漁護署,強烈建議擱置草擬指引,表明如果喺魚檔充滿積水環境下用電,好易發生觸電意外,令魚販同市民受傷。佢又認為,草擬指引不切實際,兼浪費人力物力,強調唔好因為小部分人嘅投訴同唔理解,就推行錯誤政策引起不必要影響。署方喺上周末就即刻澄清話,無考慮過劏魚前要電暈活魚。
早前有魚販反映活鱔難處理,依家多數都係用錐插進魚頭部位置再劏,令人感覺殘忍,點樣劏鱔先係最好?高佬賢直言「依家咁最好」,條鱔有潺捉唔到,有建議話先放落冰水,凍到條鱔冬眠後再劏,咁亦唔代表條魚唔痛,「條魚喺海底都係凍㗎喇」,認為漁護署未經諮詢,無問過魚販點做就想一步登天出指引,是不能接受及不可行。佢強調,署方想做嘅方向唔係絕對有錯,係需要逐步攞共識點樣去做,唔好最後搞鑊粥出嚟。
點樣令條魚唔痛,作為人類真係未必最清楚,但係點樣劏魚最好,可能魚販先最清楚嘞,既然搞個影響業界嘅指引,漁護署應該問清楚業界先啦,否則隨時魚又幫唔到,仲要影響埋啲魚販,咁就人同魚都唔好受啦!