政Whats噏:戴耀廷適應獄中生活 被分配做剪線頭

20190513
東網電視
更多新聞短片
戴耀廷會善用每星期3個可以外出跑步嘅下午,每次繞足球場跑40分鐘。
違法佔領行動(佔中)案中同被判囚16個月嘅佔中發起人戴耀廷同陳健民,依家分別喺大嶼山石壁監獄同壁屋監獄服刑。民主黨屯門區議員朱順雅今早(13日)喺Facebook貼文,話早幾日曾經去探監,形容佢哋精神同氣色都唔錯,仲話戴耀廷被分配到裁衣部門,負責嘅工作係剪線頭。
朱順雅話戴耀廷被囚喺二人倉,佢唯一嘅室友對佢亦好照顧,令初時覺得獄中節奏頗難熬嘅佢,亦總算適應過嚟,又引述戴耀廷話近年已建立咗慢跑習慣,最長試過跑20公里,所以喺石壁嘅日子,佢會善用每星期3個可以外出跑步嘅下午,每次繞足球場跑40分鐘,約20多圈,一般可完成5到6公里,而有啲囚友亦會向佢查詢或請教一啲法律嘅問題。
陳健民就被囚喺30人倉,朱引述陳話同倉嘅囚友幾乎九成都吸煙,但啲囚友都好尊重佢,吸煙時會選擇盡量遠離佢,避免佢受到二手煙嘅困擾。佢又引述陳健民話,每日都堅持運動,習慣‪清晨5點‬幾就起床坐禪同慢跑,但至今未賺夠錢添置合適嘅跑步鞋,要喺獄中努力工作,希望可以盡快買一雙「白飯魚」去跑步。陳健民被分配做木工,喺晚上會睇書之外,亦會幫一啲囚友補習英文,同佢哋傾下偈咁。