政Whats噏：馮英倫囝囝出世　親戚傳授湊仔經

對於想生兒育女嘅父母嚟講，能夠迎接自己嘅仔女來臨，絕對係萬分期待嘅開心事，好似發展局局長政治助理馮英倫(Allen)嘅囝囝馮以仁尋日(17日)出世，Allen直言好開心，話太太係預約開刀，過程都相當快，只係計生仔都係半個鐘左右，前前後後一個鐘就已經搞掂晒，相當順利，母子平安。Allen都有全程陪住太太，仲話依家香港已經有侍產假，所以唔單止可以陪太太入產房，未來幾日都有多啲時間陪佢喇！

對於第一次做爸爸嘅Allen嚟講，唔多唔少都有啲緊張，不過佢都有信心搞掂，畢竟佢同太太一早已經做足功課，睇咗好多教新手父母點做嘅資料，亦都請咗陪月員，了解晒陪月應該要食乜等。Allen仲話雖然佢哋冇湊仔經驗，但佢有好多長輩同親戚朋友都有，特別係有啲親戚最近先抱孫，都畀咗唔少意見佢哋，睇見Allen準備咁充足，相信湊仔都應該難唔到佢喇。