堅持自備食物袋　湯麵店員險淥傷　環保客︰點解人哋得

港人環保意識日增，不少人購買外賣時會自備餐具。惟近日有食客堅持使用不隔熱的食物袋外賣湯麵，令店員險遭燙傷。

有餐廳店員向Facebook群組「西客之道 Hispitality Secret」投稿指，有食客購買湯麵時，要求使用環保食物袋，惟該食物袋並不隔熱，亦較軟身，他認為處理上甚具難度。但食客堅持其他麵店亦能順利倒入米線，要求他們先作嘗試。

他指自己與同事多番嘗試︰「攞個麵碗，逗住個袋都係入唔到落去，仲差啲淥親。」遂向食客建議走湯或者用外賣碗盛湯，誰料該食客聞言怒斥：「點解人哋得，你哋唔得」。

店員在貼文慨嘆情況屢見不鮮：「好多人真係特別無禮貌，恃住環保XX住晒。有心嘅客攞個飯壺嚟買，而唔係聲大大，咁老奉要人就晒你。」

不少網民斥責：「同環保無關，同人品有關」、「畀佢自己裝，佢自己裝唔到一係轉堂食，一係外賣碗」、「同佢講介唔介意返去人哋嗰間度食」。

---------------

《港呢啲》：大事小事騎呢事，東網嚴謹選題，輕鬆製作！