政Whats噏：狗狗大病初愈險又中暑　嚇親梁美芬

政府滅鼠不力，有「鼠王芬」之稱嘅立法會議員梁美芬專登搵咗廣州鼠王嚟香港幫手，呢幾日都講得老鼠多，佢日前喺Facebook貼文又講喎，仲講明此「暑」不同彼「鼠」，事關佢係講中暑。唔通佢中暑？係佢隻狗狗呀！

梁美芬日前喺fb貼文，話經過6個星期，佢隻狗狗Curtis已由深切治療部返咗屋企休養，仲康復得好好，近日已開始同家人一齊散步。有日趁傍晚時太陽唔係太猛烈，佢哋帶Curtis到海濱散步，只係行咗100米度，愛犬就表現得有啲唔妥，又想跳上櫈，又想跳上佢哋嘅手，而且一直不停喘氣。

見情況唔妥，佢就立刻帶Curtis去睇獸醫 ，獸醫話狗狗體溫40度，幾乎中暑，所以即時用正常室溫嘅水替佢降溫，又畀水佢飲，補充水分，之後愛犬好快就康復，又再展現精靈嘅一面嘞！

佢話原來海濱地面較「㷫」，而且狗狗矮小，喺地面上行走時就好似行喺溫板上，容易中暑，所以佢就提醒各位愛狗人士，同愛犬散步時要多留意佢哋嘅反應，慎防佢哋中暑。