每日一片：入彎剷水氹　私家車公路打180度白鴿轉

天雨路滑，交通意外頻頻發生。昨日(27日)有車Cam就在馬路拍到驚險一幕。一架私家車入彎時，剷上路邊大水氹，隨即失控大打白鴿轉，最終有驚無險。不過片中亮點卻並非肇事私家車，反而路上其他車輛神級閃避動作，就令網民大表讚賞。

據車Cam資料顯示，事發於昨日下午4時許，當時一架私家車沿馬路行駛，至一彎位時，疑路滑跣胎剷上路邊水氹，私家車失控下橫跨三條行車線180度打轉，而路上其他駕駛者突然見有車「打橫行」，亦紛紛扭軚閃避，未撞及涉事私家車。

網民慶幸私家車未釀成嚴重意外，更大讚片段中其他司機「閃得夠快」，「中線架白色車好好反應」。不少身為駕駛者的網民直指近日連場大雨，造成不少交通意外，「點解今日啲頭轆車架架都可以飄移」、「呢單唔知今日第幾單」、有人更奉勸駕駛者，「 一落雨就咁多意外，揸車都要小心啲。」