政Whats噏：畀人話完識改　馮英倫添丁8日就返工

近來唔少副局長同政治助理都畀議員鬧成日唔見人，好少聯絡，包括發展局局長政治助理馮英倫(Allen)都曾經畀議員點名批評，不過近來見到佢添丁8日，已經現身立法會，唔通畀人話完就知驚？

上月25號，立法會加開嘅工務小組委員會，審議逾5億港元嘅中部水域人工島嘅相關研究項目，項目爭議性咁大，難怪當日見Allen頻頻喺走廊出出入入啦。

咁快現身，唔通冇放假就返工？Allen話，之前已經放咗5日侍產假，而且太太選擇開刀生BB，咁就更易預日子，當日會議結束後亦急返屋企，因為有親戚去探BB。

佢仲話照顧囝囝已經開始上手，唔似初初連掃風會驚整親佢，而囝囝曾經要留院4日照燈，不過嬰兒黃疸並非罕見，加上醫學昌明對小朋友嘅檢測足夠，亦有相應嘅專門治療可以令父母相對安心，之不過Allen作為新手父母總會對BB打針、抽血等，覺得擔心同心痛囉。Allen仲話，依家有陪月員預備食材畀太太，連佢都有份受惠，搞到短短一個星期多已經增磅添。