政Whats噏:懲教署三度拒批外出 邵家臻無得提修正案

20190605
東網電視
更多新聞短片
今次係邵家臻(中)第三次被拒絕申請外出。
立法會今日(5日)辯論由議員陳恒鑌提出「推動醫療改革」嘅動議,而因違法佔領行動(佔中)被判入獄8個月、仍在赤柱服刑嘅社會福利界議員邵家臻,早前向懲教署申請外出開會就動議提出修正案,佢尋日(4日)喺Facebook貼文,指懲教署再度拒絕申請,即係佢無法喺大會上提出相關修正案,呢次亦係佢第三次被拒絕申請外出。
邵家臻指懲教署拒絕其外出申請嘅理由,包括署方冇法律責任幫在囚立法會議員完成公職、立法會唔會因為邵缺席而停止運作,以及涉及大量保安工作。
實際上,另一議員張超雄於上周五(1日)要求立法會內務委員會討論去信懲教署,批准邵家臻申請外出許可履行職務,最終被內會否決,當時有建制派議員認為議員犯法唔應該享有特權,更有議員要求邵考慮自行辭職。