政Whats噏：韋志成續任市建局行政總監

政府宣布再度委任韋志成為市區重建局行政總監，任期3年，6月15日起生效。韋志成話，隨着兩項新策略研究──油旺地區研究、樓宇復修策略研究將於年底完成，佢期望為市區更新工作持續推展，帶來更具前瞻性方向同策略，並以規劃為主導嘅市區更新新模式，以及推動樓宇復修，特別係預防性樓宇維修保養方面，為舊區制訂綜合而全面嘅市區更新藍圖，處理愈益嚴重嘅市區老化。

發展局局長黃偉綸歡迎韋志成繼續擔任市建局行政總監，對佢喺過去3年盡心竭力領導市建局推展各項市區更新工作，表示衷心感謝。市建局主席周松崗則稱，自2016年6月獲委任為市建局行政總監，韋志成以卓越嘅領導才能、專業知識同管理經驗，帶領市建局團隊推動同落實多項市區更新工作，有顯著成績。

韋志成本身係工程師，佢喺政府服務35年，2015年4月退休前係發展局常任秘書長(工務)。