政Whats噏：再「被瘋傳」荔枝有食肉菌　張華峰急阻截

依家立法會氣氛好緊張，但係金融服務界議員張華峰(肥佬闆)竟然仲掛住食喎。食乜嘢？咪又係荔枝囉！

肥老闆日前喺Facebook貼文，話依家炎炎夏日，又到準備食荔枝嘅季節，但佢未食都已上火，點解？事關佢話唔知點解，喺前年一個有關荔枝有食肉菌嘅「謠傳」，今年又再死灰復燃。

佢話兩年前已多次喺唔同場合澄清，更有主流媒體報道，但今年又被「有心人」惡意利用，喺網上不斷傳遞有關不實訊息。佢希望謠言止於智者，叫市民唔好相信謠傳，仲將東網喺兩年前載有佢澄清嘅報道擺埋上網添！

其實荔枝有食肉菌係內地一則已被謠傳多時嘅舊聞，肥老闆喺兩年前收到呢個消息向朋友傳發，之後網上更瘋傳一則肥老闆溫馨提示嘅短訊，指荔枝有好多蟲「國內人士死很多」，更呼籲民眾為咗健康少買荔枝。而佢當日亦急急喺fb發聲明話自己並冇撰寫有關訊息，點知事隔兩年謠傳再起，所以難怪佢咁緊張，急急貼文阻截喇！