政Whats噏:任監警會主席即遇七一 郭琳廣遲去愛女畢業禮

20190606
東網電視
更多新聞短片
郭琳廣當時上任監警會主席隨即要迎接七一遊行。(黃仲民攝)
監警會為慶祝成立10周年,今日(6日)喺香港大學舉辦研討會,邀請咗世界各地機構同學者一齊討論未來發展方向,幾位前任主席包括鄧國楨、翟紹唐同郭琳廣都有出席。其中由2014年到2018年出任監警會主席的郭琳廣分享嘅時候提到,唔少人形容佢嘅任期非常刺激,但對佢嚟講更似係入咗「熱廚房」。
郭提到自己喺2014年6月1號正式上任,隨即就要迎接七一遊行,根據當時傳媒報道有50萬人參加,當日監警會由中午起喺現場視察咗超過12個鐘,更加令原定飛去英國參加囡囡畢業禮嘅佢要延遲起行。
而七一後大約兩個月就爆發佔中,郭話當時監警會上下都面對難以承受嘅壓力,甚至半夜都收到投訴電話,監警會喺佔中期間收到有史以來最多投訴,甚至有組織話明知監警會當時都做唔到啲咩,但照樣投訴嚟向警方同政府施壓。佢又提到當時有委員打算辭職,以示唔同意警方施放催淚彈,佢就向嗰名委員解釋辭職都於事無補,仲會令監警會情況變得更差,最後要出盡全力去說服,幾乎要跪地請求,嗰位委員先無辭職。