政Whats噏:悄悄撤回巴西肉廠名單 食安翹起業界

20190616
東網電視
更多新聞短片
食安悄悄撤回巴西肉廠名單,議員邵家輝話當局冇同業界交代過諮詢結果。(設計圖片)
香港嘅肉類安全多次出事,最近多次爆發非洲豬瘟,前年亦爆出過巴西腐肉風暴,港府亦一度計劃大減可向香港進口凍肉嘅巴西肉廠數目,建議限制喺80間,諮詢結果一直冇晒影。據了解,呢份80間巴西肉廠嘅名單,依家對後續工作已經冇乜意義,意味着已經唔存在啦。批發及零售界議員邵家輝就話,當局根本冇同業界交代諮詢結果,自己之前都帶咗成班業界去傾㗎嘛,如果冇咗個名單,應該快啲講啦!睇嚟食物及衞生局局長陳肇始應該快啲同業界溝通,唔好將啲事收收埋埋啦!
話說前年巴西腐肉風暴爆發時,本港食物安全中心(食安中心)揭發巴西冷藏雞腳偽造衞生證明書個案,食安中心曾向業界諮詢,打算將可向香港進口凍肉嘅巴西肉廠數目限制喺80間,其時聲稱已經佔大部分進口量。
不過,業界當時就已經有極大反響,其時指香港業界目前向逾400間廠攞貨,批評加入新限制會減少入平貨嘅途徑,如果巴西肉廠合謀加價,香港業界就會「肉隨砧板上」等多項影響,警告隨時搞到豬扒同雞翼等凍肉大幅加價。
據知,食安中心雖然以呢份80間巴西肉廠嘅名單諮詢業界,但名單只係討論基礎同起步點,收到業界意見後,依家相關名單對後續工作意義不大,本港當局會同巴西當局商討可出口到本港廠房嘅名單同數目,以廠房嘅食物安全條件作首要考慮,過程會諮詢業界,做好平衡咁話。
邵家輝就話,自己當時帶過業界去傾呢個問題,過咗咁耐,到底有咩進展仲係一舊雲咁,若果已經冇80間廠呢個數,當局應該盡快交代,而且一開始亦唔應該即刻限死得80間供應,咁急只會自亂陣腳,日後都應考慮唔好立亂公布有幾多間獲准供應嘅數字,否則數字一有更改,就會好混亂。
邵又話,唔止巴西凍肉,當局搞非洲豬瘟都搞得好差,零售業界想罷市,國內啲農場嬲香港搞得咁麻煩,唔多想供應畀香港,本港供應唔穩定,價格自然高,啲雞隻供應情況又類似係咁,樣樣肉類都貴,就快乜都冇得食,當局應該喺食物安全同營商環境之間做好啲喎!
講真嗰句,應唔應該限制供應廠嘅數目,真係好難講對與錯,如果冇限制,啲肉爆出食安問題,到時都好大鑊。不過,陳肇始真係應該要同業界溝通多啲,有諮詢結果就唔應該收收埋埋啦!